Klubi i Skëndebreut ka vazhduar përgatitjet për sezonin e ri futbollistik në vendin tonë i cili për korçarët nis më herët se skuadrat e tjera. Ekipi i drejtuar nga Orges Shehi ka planifikuar një tjetër miqësore këtë javë, për të parë gjendjen e lojtarëve të cilët janë vënë në dispozicion të teknikut.
Sipas një njoftimi të klubit, të shtunën do të luhet ndeshja e pestë përgatitore, ndaj ekipit të Besës së Kavajës, që luan në Kategorinë e Parë në këtë sezon. Ky do të jetë testi i pestë për korçarët që e nisën me Maliqin, për të vazhduar me Renovën, Teutën dhe Trepça ’89 përgatitjet e tyre për sezonin e ri.
Klubi bëri të ditur njëkohësisht se më në fund mesfushorët Lulaj dhe Hoxhaj i janë bashkuar stërvitjes me pjesën tjetër të skuadrës, pasi kanë lënë pas problemet fizike të ditëve të kaluara dhe tashmë do të jenë në dispozicion të trajnerit edhe për takimin e fundjavës.
