“Ujqërit e dëborës” fillojnë organizimin për në Belfast

Tifozët e Skënderbeut janë duke menduar së pari për ndeshjen e parë të Championsit, atë të 14 korrikut, ku pa dyshim pritet një organizim super, por që dje ka filluar edhe organizimi për ndeshjen e kthimit, atë të 21 korrikut, në Belfast. Në fakt, largësia e madhe bën që çmimi për të mbështetur Skënderbeun deri në Belfast të jetë i kripur. Plot 500 euro do t’u kushtojë tifozëve të Skënderbeut, të cilët kanë dëshirë ta ndjekin skuadrën e zemrës në këtë transfertë të largët.

Gjithmonë nëse grupi do të jetë i plotë, do të vendoset një charter në dispozicion të ultrasve të Skënderbeut. Ja cila ka qenë thirrja e djeshme për tifozët e Skënderbeut nëpërmjet faqes së tyre zyrtare në “facebook”: “Kush ka dëshirë për të udhëtuar me ekipin drejt Irlandës së Veriut, në ndeshjen e kthimit, të kontaktojë me drejtuesit e shoqatës. Në dispozicionin tonë do të jetë një avion charter. Bileta e avionit vajtje-ardhje do të jetë 500 euro për person”.