“E kam thënë që ditën e parë që firmosa për Skënderbeun se kjo skuadër do të shpallet kampione. Vazhdoj ta them dhe tani besoj se fjalët e mia i mbështesin të gjithë, sepse duket qartë se kush është skuadra më e mirë dhe që e meriton të shpallet kampione”, – thekson mes të tjerash në intervistën për “Sport Ekspres” mesfushori Bernard Berisha, i cili shënoi golin e tretë në fitoren me Partizanin. Pas çdo goli, me veprimet e tij, ai bën që të gjithë të kalojnë në delir. Berisha do të mungojë në ndeshjen e radhës ndaj Apolonisë, por kjo pak rëndësi ka për të, pasi e rëndësishme është që në ndeshjet vendimtare të jetë.
– Berisha, jeni më i qetë pas asaj fitoreje ndaj Partizanit?
– Pse kush mendonte se nuk do ta mundnim Partizanin? Të gjithë e dinë se kush është Skënderbeu. Partizanin edhe në fazën e dytë e mundëm 3-0 në Korçë dhe këtë herë nuk bëmë gjë tjetër, veçse shënuam dy gola më shumë. Nuk është ndonjë çudi që fituam, pasi Partizanin e kemi mundur dy herë, ndërsa në kryeqytet një herë na mundi minutën e fundit me 11-metërsh dhe në fazën e tretë barazuam 0-0. Pra, duelet me këtë ekip i kemi fituar.
– Kaq i sigurt ishit që do ta fitonit këtë ndeshje, pasi Partizani është një skuadër e fortë?
– Jam shumë i sigurt për skuadrën time dhe tek ajo që ne japim në fushë. Jemi skuadra më e mirë e Superligës dhe këtë as që e diskutoj. Duke pasur këtë besim, arritëm të tregonim se jemi më të mirët dhe e mundëm Partizanin, edhe me mungesa të shumta.
– Mund të na thoni fitoi Skënderbeu apo të kuqtë nuk ishin në një ditë të mirë?
– Në katër ndeshjet e sezonit me të kuqtë kemi marrë 7 pikë, ndërkohë që Partizani 4. Këtu duket se jemi superiorë. Por në atë ndeshje nuk lamë asnjë hapësirë dhe shfrytëzuam më së miri mundësitë që na u dhanë. Prandaj fituam, madje bindshëm.
– Shënuat golin e tretë, që “vulosi” fitoren, vetëm 20 sekonda pas startit të pjesës së dytë. Si u ndjetë?
– U ndjeva vërtet mirë dhe e prisja të shënoja. Kisha gjithë javës që u thosha edhe shokëve në stërvitje se do të shënoja dhe e bëra. Golat në ndeshje të tilla vlejnë dyfish. U ndjeva shumë mirë, kur pashë topin në rrjetë dhe vrapova të ndaja gëzimin me të gjithë tifozët, sepse ata na mbështetën shumë.
– Skënderbeu kthehet sërish në krye. Mendoni se nuk do ta lëshojë më vendin e parë?
– Një gjë e tillë do të ndodhte. Të gjithë e prisnim, sepse ekipet e tjera nuk mund ta mbajnë presionin. Tani jemi në krye dhe të tjerat i shikojmë nga lart.
– Por ju vetëm një javë më parë zbritët në vend të dytë. Pse këto luhatje?
– Në futboll lejohen edhe gjëra të tilla, por e rëndësishme është vazhdimësia. Në gabuam në Laç dhe humbëm një ndeshje, që kurrsesi nuk e mendonim të humbur, duke parë si rrodhën ngjarjet. Ishte vetëm një ditë e errët. Tashmë flasim si kryesues, kur kanë mbetur edhe 6 javë. Nuk e vë në diskutim që do ta mbyllim të parët. Po them një të vërtet, që e dinë të gjithë.
– Po për Kupën, çfarë mendoni?
– Në ndeshjen e parë humbëm në Kukës me një gol dhe gjithçka është e hapur. Do ta luajmë në shtëpi ndeshjen e kthimit dhe këtu nuk do të falim. Do të jemi në finale.
– Cili është rivali juaj kryesor?
– Nuk shoh asnjë skuadër rivale për Skënderbeun. Rivale kemi vetëm veten.
